18日8月2004年， 星期三 漢城度做一晚冇權總統

早上十一點幾到雪邦國際機場先知到原來班機延遲咗，搞到成中午一點五十分先飛。就咁喺架飛機度坐咗成六粒鍾先到達韓國（漢城嘅INCHEON國際機場）。點知喺過緊關卡（人民入境處）時就遇著我國政要人物保擭隊（又叫G4）啲人過緊境；時關我國首相喺未來幾日會拜訪韓國嘛。就喺咁得閑嘅情況下左望右睇。。。先發覺原來漢城機場真喺好鬼嚴，啲保安哥哥姐姐一見你冇乜順“超”就叫你落房照肺；一嗰唔好彩，可能連老底都照埋就“暼家伙”。。。不過我同阿Ray兩個都咁靚仔更喺順利過關啦。

搞掂嗮啲手續後就踏出漢城嘅第一步嘞。噔噔噔。。。落毛毛雨。。。點知就太夜，冇直通巴士去我哋落腳嗰間五星級酒店（The Westin Chosun）；咁為有問人，點知佢哋啲英文又唔好，而我哋有唔識韓文。。。呢舗就真喺雞同鴨講；大家喺度“唭嚦咕嚕”好一陣，之後嗰人先做嗰交叉手勢（即喺冇嗮巴士咁解）。叫我哋轉搭另一班到City Hall站嘅巴士然後再步行過去間酒店度。期間有嗰的士佬走過同我哋講冇嗮巴士又問我哋要坐的士冇。。。喺度依樣嗰樣。。。成嗰想昆人嗰樣出嗮嚟，我同阿Ray邊上當吖~ 終于過多五分鍾嗰巴士就嚟咗；呢次應該喺我咁大嗰仔坐最貴嘅巴士（成7000 WON一張車票。。。你話夠變態冇吖~）。坐咗嗰幾鍾巴士後就終于到達目的地嘞，嘩！漢城啲馬路條條都最小3條線，大嘅都有成十條線；真跨張。。。

入到酒店check in咗拎咗鎖匙後冇幾耐就上房沖涼兼休息嘞。但喺點知一開門我同阿Ray就以經嘩聲四起吖~??時關我哋入住嗰間喺總統套房吖。。。間房仲大過我間屋添，有會議室，客廳，書房（有埋Internet ready電腦添），“揸沽池”，衣帽間，大床同埋嗰50吋Plasma電視機。我哋兩條友即刻拎數碼相機拍video同猛咁影相。。。哈哈。。。十足十啲大鄉里出城咁嘅款。影完相更喺叫Room service呵打晚餐啦，跟住就去沖涼嘞；沖完涼出嚟就睇到一碟碟嘅三紋治同香噴噴嘅炸薯條。。。哈哈哈。。。住豪房啲感覺真好feel。

轉載于:https://www.cnblogs.com/hackzai/archive/2004/08/19/34670.html

總結

以上是生活随笔為你收集整理的漢城博殺的日子 （一）的全部內容，希望文章能夠幫你解決所遇到的問題。

如果覺得生活随笔網站內容還不錯，歡迎將生活随笔推薦給好友。